Hrikalega finnst mér alltaf erfitt að finna haus á færslurnar . 
En allavega... þá er enn ein helgin að verða búin OG fyrri frívikan mín. Þessi vika hefur reyndar verið hrikalega lengi að líða enda er ég ekki búin að gera neitt að viti .
Í lok vikunnar fór ég reyndar að byrja að hreyfa mig!! Hef verið að taka mér stutta göngutúra, maður verður bara þunglyndur á að hanga og gera ekki neitt en ég var nú samt ekkert illa stödd . Bíð samt eftir því að losna við saumana, þá þarf ég allavega ekki að hafa áhyggjur af því að slíta þá.

Á föstudagsmorgun vöknuðum við Jóna "frekar snemma" og kíktum til Gråsten í búðir og röltum síðan hring í drottningargarðinum. Það er farið að kólna svolítið en veðrið er samt búið að vera yndislegt, blanka logn og heiðskýrt.

Á föstudagskvöldið fór ég á kaffihús. Hitti þar Póllandsfarana og þar var farið yfir stöðu mála!!! Iss hvað þetta er eitthvað formlega orðað!!

Á laugardag fórum við með strákana í klippingu til Jónu þannig að það er allt annað líf að sjá hausana á þeim. En þegar við vorum komin út þá tókst Jóhanni Inga að hlaupa á grindverk og fá gat á hausinn. Við vorum á báðum áttum um hvort við ættum að láta sauma hann en ákváðum svo að sleppa því, þetta leit ekki það illa út.
Þetta ástand á okkur hérna fer nú að verða hálf vandræðalegt, allavega ef þetta fer ekki að fara batnandi, þá meina ég sjúkrahús-ástandið! Annað hvort endar þetta með því að við förum að þekkja allt starfsfólkið þarna eða bara að það verði hætt að svara í símann þarna ef við hringjum??? Hummm... hvort væri nú líklegra???

Seinni partinn á laugardag fórum við í grillveislu. Þar var fullt af fólki og fullt af börnum og mjög gaman. Strákarnir skemmtu sér konunglega enda risa stórt trampólín í garðinum og við vissum varla af þeim allan tímann meðan við vorum þarna.
Binni kíkti með nokkrum strákum í partý en ég fór bara snemma að sofa.

Í dag ætlaði ég nú að gera svo margt...en var síðan bara aðallega löt. Ég ætlaði að byrja að baka fyrir afmælið hans J.I. en það varð bara ekkert af því!! En ég fór með strákunum og Jónu niður að tjörn að gefa öndunum og brjáluðu mávunum brauð. Við vorum þarna örugglega í u.þ.b. 2 klst. veðrið var svo frábært og við hittum Alexander vin þeirra og co. við tjörnina þannig að við náðum að viðra okkur ágætlega í dag .

Strákarnir eru í vetrarfríi alla næstu viku nema kannski einn dag. En Ásbjörn á að mæta kl. 7.45 í röntgen í fyrramálið, þannig að það verður enginn sofa út dagur á morgun!!
Ég er orðin pínu kvíðin fyrir því hvað þeir ætla að gera við hann því stykkið hefur ekki enn skilað sér út!!

Þannig að næsta frívika er alveg óráðin. Það fer alveg eftir því hvað  verður gert við Ásbjörn karlinn.

Ég ætlaði að fara að setja inn myndir, en ég er víst komin í skuld fyrir myndaplássi og eina leiðin til að borga er í gegnum símareikninga!!! En ég held að það sé bara vesen í gegnum erlendan síma og örugglega miklu dýrara þ.e.a.s. ef það er þá hægt?? En ég sendi fyrirspurn til bloggar.is fyrir nokkrum mánuðum síðan um það hvernig ég geti borgað fyrir myndaplássið en hef aldrei fengið svar frá þeim!!! Ég verð að skoða þetta eitthvað betur .

Bið að heilsa í bili....
                                 Knús.........

Þetta er nú meira ástandið á þessari fjölskyldu.
Ásbjörn fór í röntgenmyndatöku í morgun til að ath. með hlutinn sem hann gleypti og hann sat enn á sama stað. Þannig að nú er hann í svæfingu og það á að sækja hlutinn. Hann var bara voða brattur þegar ég heyrði í honum áðan og hann nennti ekkert að tala við mig , honum finnst frekar leiðinlegt að tala í síma þannig að ég tók þessu ekkert persónulega . En mér finnst voða leiðinlegt að húka hér heima og geta ekki verið hjá honum . Ég treysti mér ekki til að fara með hann í morgun svo Binni tók sér frí í skólanum. Ég er að reyna að taka því rólega hér heima en það er frekar erfitt að horfa á mömmu hans Binna vesenast í þvottinum og nú er hún á fullu að ryksuga og ég geri ekki neitt og ef ég reyni að gera eitthvað fæ ég að heyra það .
Ég er samt miklu betri núna en í morgun. Ég tók bólgueyðandi töflur og er miklu betri eftir það.

Í gær voru hálfgerð jól hjá strákunum!! Pakkaflóð til þeirra beggja. Takk fyrir strákana . Monika Rós og Stebbi pabbi hennar komu til okkar með kökur og svo fór Stebbi á Mc´donalds og sótti barnabox fyrir krakkana. Þannig að það var kósý lítil veisla hér í gær .
Svo var leikið og spilað á spil og voða gaman hjá þeim. Ég var að spá í að halda uppá afmælið hans Jóhanns Inga á mánudaginn. Þá eru flestir í vetrarfríi og þá get ég verið komin í gang fyrir helgi og bakað um helgina . Þannig að þeir sem ætla að mæta, endilega að drífa sig að panta flug .

Ég læt vita hvernig gengur með Ásbjörn.
Bless í bili.

Til hamingju með afmælið Jóhann Ingi.
Já loksins orðinn 4 ára . Hann leit geislandi á mig í morgun með fjóra putta upp í loftið og svo sýndi hann mér ylina á sér og bað mig að sjá hvað hún væri orðin stór . Svo fékk hann að opna einn pakka áður en hann fór í leikskólann. Trítlaði síðan út með nammiköku og nammipoka til bjóða krökkunum í leikskólanum.
Afmælisveislan sjálf fær að bíða þar til um eða eftir næstu helgi. Kemur í ljós í vikunni!!!

Í gærmorgun mætti ég á Aabenraa sjúkrahúsið kl. 7.15
Fór í blóðprufu og fleira og fór svo í aðgerð um kl. 10.30 Ég var eiginlega rotuð allan gærdaginn, svaf meðan ég beið eftir að fara í aðgerðina og var því ný vöknuð þegar ég var svæfð. En þetta gekk allt saman mjög vel. Það voru gerð 3 göt á magann á mér og aðgerðin sjálf fór fram í gegnum naflann! Þannig að ég er svolítið bogin þessa dagana. Síðan var ég dottandi í allan gærdag, ég var eiginlega farin að skammast mín, ég var alltaf sofandi þegar hjúkkan kíkti inn til mín . Ég fór heim um kl.21 í gærkvöldi, ég nennti ekki að gista þarna. Það er miklu betra að vera veikur heima hjá sér .
Ég á sjálf að skipta um plástra og á svo að fara til heimilislæknis til að láta taka saumana eftir 10 daga. En ég ætti að vera orðin full frísk fyrir næstu helgi .

Fleira var nú ekki í fréttum hjá okkur að þessu sinni .
Over and out...

Verður fögurra ára í næstu viku og hjólar án hjálparadekkja . Ég skrúfaði þau af í dag og minns bara hjólaði og hjólaði og hjólaði alla leið til vinar síns, sem er dágóð vegalengd og mamman fékk sko að svitna . Ég þurfti bara að hlaupa á eftir honum en hann var samt voða almennilegur að hægja á sér til að ég gæti náð andanum . Og hvað minns var montinn , hann gjörsamlega geislaði  og mamman auðvitað líka, stolt af litla barninu sem er að verða svo stórt.

Helgin er búin að vera mjög fín hjá okkur.
Árný, Stebbi og Monika Rós borðuðu með okkur á föstudaginn og á laugardaginn komu Jóna Björk, Haffi og börn í heimsókn. Strákarnir náðu rosalega vel saman og er því beðið með eftirvæntingu að hitta Gabríel aftur . Það yrði nú gaman að taka rúnt til Esbjerg einhvern daginn og kíkja á þau. Takk fyrir skemmtilega heimsókn .

Um kvöldið hjólaði ég til Dagmar og Sólveigar. Við áttum alveg yndislega huggulega kvöldstund. Töluðum, hlógum og grétum og allt þar á milli . Stútuðum nokkrum flöskum eins og okkur einum er lagið er við hittumst!!! öhömm... En þetta rann allt saman ljúft niður.

Já og svo er ein pirringsfrétt!!
Aðgerðinni var frestað til 8 okt. Og þetta er í annað skiptið sem þessu er frestað . Ég röflaði aðeins í konunni sem hringdi í mig, sagði henni að þetta hentaði mér ekkert. Ég er búin að fá frí í skólanum og vikuna sem ég fer í aðgerðina er ég fullbókuð enda gert ráð fyrir að ég myndi mæta aftur þá . En hún sagðist náttúrulega ekkert geta við þessu gert. Það er eins gott að þessi dagsetning standist. Ég nenni ekki svona veseni.

Á morgun kemur Jóna, mamma hans Binna til okkar , en ég hitti hana því miður ekki fyrr en seinnipart þriðjudags v/ skólans. En svo á ég frí frá fimmtudegi og næstu 2 vikur á eftir , því seinni vikan er vetrarfrí. Þannig að við ættum að geta eitt góðum tíma saman.

Læt þetta gott heita í bili, bestu kveðjur...

Nú er ég bara ein í kotinu og þá nýti ég tímann og hangi í tölvunni!!! Það er búið að vera úrhellis rigning síðustu daga og nennarinn í mér eitthvað vanvirkur!!!
Ásbjörn er búinn að missa aðra tönn, og finnst agalega gaman að reyna að bíta í matinn sinn þar sem tennurnar vantar og þar af leiðandi er hann endalaust lengi að borða .
Á miðvikudaginn var Itrædsdag í skólanum hans. Þá koma foreldrar í skólann og fara með börnunum í allskonar þrautir utandyra. En greyið Ásbjörn á svo ómögulega foreldra, ég steingleymdi þessum degi. Hafði svo mikið fyrir því að muna eftir foreldrafundinum sem var í skólanum í gær . En ein fóstran tók hann að sér og svo þegar Binni ætlaði að sækja hann vildi hann vera lengur og fékk að vera með Ísabellu og foreldrum hennar, svo kíkti hann með þeim í heimsókn og skemmti sér konunglega , þannig að þessi dagur endaði vel eftir allt saman. Ég fékk náttúrulega alveg nagandi samviskubit, allir krakkar með foreldrum sínum í leikjun nema mitt barn . En vonandi kemur þetta ekki fyrir aftur.
Í kvöld fer Ásbjörn aftur í skólann og gistir eina nótt, rosa spennandi. Ég lofaði að baka kanilsnúða fyrir krakkana og svo koma aðrir með kökur og svo meiga þau líka taka nammi með. Þannig að það verður allsherjar partý hjá þeim .

Í gær tók ég mig til og skráði okkur á biðlista eftir stærri íbúð . Sótti um í sama hverfi og við búum í núna, nema 4 herbergja, með garði. Við förum beint í forgang á listanum því við búum í hverfinu. Svo sótti ég líka um í raðhúsi hér rétt hjá. Við viljum vera áfram hér í nágrenninu svo það sé stutt fyrir Ásbjörn í skólann, og hann þurfi helst ekki að labba yfir stóra götu á leið í skólann. En það eru þó alltaf umferðarverðir við gangbrautirnar á morgnana, sem stoppa bílana og hleypa gangani og hjólandi vegfarendum yfir, því það er tilfelli ef danir stoppa við gangbraut, hvað þá þar sem ekki er gangbraut til að hleypa fólki yfir!

Á þriðjudaginn fór ég í forskoðun fyrir aðgerð og fékk tíma 2 okt. Ég bjóst nú alls ekki við að komast svona fljótt að. Ég talaði við skurðlækninn og hún lét mig leggjast uppá bekk og sýndi mér allt sem yrði gert við mig, hvar götin verða stungin og alles. Síðan talaði ég við svæfingalækninn sem sagði mér frá svæfingunni og hvar lyfinu yrði dælt í mig og það allt, svo fór ég í blóðprufu og hjartalínurit. Ég var svo hissa á öllum þessum upplýsingum sem þau gáfu mér, þau sögðu mér allt. Ef eitthvað myndi klikka við aðgerðina, þá myndu þau gera þetta og þetta og þetta o.s.frv. og svo fékk ég líka bæklinga og símanr. sem ég get hringt í ef mig vantar að vita eitthvað.
Og Jóna mamma hans Binna ætlar að koma til okkar 1 okt. og aðstoða fatlafólin meðan á þessu ástandi stendur . Það verður alveg yndislegt að fá hana til okkar.

Ég man nú ekki eftir fleiru í bili til að blaðra um. Ætti kannski að fara að hefa deig!! Og lave kanilsnegle???

Bestu kveðjur...

Jæja, þá er önnur lausa tönnin hans Ásbjörns dottin úr. Og þvílíkt og annað eins hvað minns var stoltur . Og bróðir hans ekkert minna stoltur!! Sá yngri hljóp eins og óður um allt og kallaði: Ásbjörn missti tönn, Ásbjörn missti tönn..... Auðvitað setti hann tönnina undir kodda og Tannálfurinn sótti hana meðan hann svaf og borgaði honum fyrir. Nú er bara beðið eftir að næsta tönn fari, en hún er orðin laf laus.

Helgin hjá okkur er búin að vera mjög fín.
Á föstudaginn vorum við að hjálpa einum íslending að flytja, eða tæma gáminn sinn. Ég var með harðsperrur alla helgina , sem segir mér það að vöðvarnir eru búnir að fá alltof mikla hvíld!!

Strákunum var boðið í mat til Hrafns vinar þeirra á föstudagskvöldið, það var rosa sport. Og ég fékk sko að heyra það alla leiðina til Hrafns að ég ætti síðan að fara heim, takk fyrir það .

Ég skellti mér síðan í bíó um kvöldið með Möggu Lukku og Sólveigu. Mjög góð mynd sem við sáum. Samt frekar fyndið hvað bíósalurinn er lítill hérna miðað við íbúafjölda!! Bíóhöllin á Skaganum er stærri!!!
Síðan skelltum við okkur á kaffihús í smá stund.

Á laugardag heimsóttu strákarnir Hörpu og síðan kom Harpa til okkar í pössun og gisti hjá okkur. Þau léku sér mjög vel allan daginn en með smá pústum inná milli sem ég held að sé bara mjög eðlilegt . En ég vissi varla af þeim og þurfti stundum að kíkja inní herbergi til að ath. hvort þau væru ekki örugglega þarna ennþá.

Binni kíkti til Horsens á laugardag. Þar var Klakamót (Fótboltamót íslendingafélaga í Dk.) Þar var víst mikið grín og mikið gaman .

Á sunnudaginn komu Jón Gunnar og Steinunn til okkar og voru að fara í flug rétt áðan. Það var æðislega gaman að fá þau í heimsókn og strákarnir voru alveg með stjörnur í augunum yfir þeim .

Í gær fóru strákarnir í "íþróttaskóla" eða íslendingafélagið leigir út íþróttasal og þar koma börnin saman og hlaupa og klifra og hoppa og allt mögulegt og þar var víst brjálað fjör. Þannig að nú eru mánudagar líka orðnir uppáhalds dagar!!

Já!! Þetta var semsagt skýrsla síðustu daga .

Ég ætla að vera svolítið "skemmtileg" núna og skrifa aðeins um skólann!! Ég skal samt reyna að missa mig ekki!!!

Það byrjuðu 3 nýjir nemendur í síðustu viku og einn af þeim er íslensk stelpa. Við Jóna hittum hana fyrst í gær og vorum búnar að kvíða því hverju við ættum að svara ef hún myndi spyrja okkur útí skólann!! En við ákváðum að segja henni bara sannleikann (en ekki hvað?) Stelpan sagðist reyndar hafa heyrt ýmislegt um skólann og var ráðlagt að fara ekki í hann en ákvað samt að prófa. Þessar tvær sem byrjuðu með henni höfðu ekki mætt síðustu daga og því var hún bara ein og var bara látin væblast þarna um skólann og fékk enga kennslu!! Hún var búin að æfa einu sinni handsnyrtingu og í gær var hún látin taka tvo kúnna í handsnyrtingu. En í rauninni á hún ekki að byrja taka kúnna fyrr en eftir 5 vikur!!! Því þessar 5 vikur eiga að fara í að æfa meðhöndlanir og fá bóklega kennslu, en henni var bara sagt að lesa heima!!!! Ég á bara ekki til orð yfir þessu. Og greyið stelpan var hálf miður sín yfir þessu (þ.e.a.s. þessari kennsluaðferð). Það er spurning hvort hún mæti aftur?? Hana langaði til að ganga út í gærmorgun.

Svo er það annað sem pirrar mig  og ég bara verð að deila með ykkur.
Nú eru kennararnir farnir að taka kúnna líka. Og þær segja að það sé gott, því þá geta þær unnið við hliðiná okkur og við séð hvernig þær vinna. EN... við erum nemendur og okkur vantar stundum aðstoð og ef kennarinn er kannski að nudda verðum við að bíða í 5-50 mín. eftir aðstoð!! Og svo á miðvikudaginn síðasta var ég með meðhöndlun með einum kennaranum, við vorum með vinkonur. Mig vantaði aðstoð til að vera viss á húðtýpu kúnnans, svo ég myndi örugglega nota réttar vörur á hana. Kennarinn gat ekki hjálpað mér (hún sat við hliðiná mér), heldur sendi mig niður til að finna gestakennara sem var í skólanum þennan dag og átti að fá hana til að hjálpa mér!! Það var eins og kennarinn væri í hálfgerði samkeppni við mig og varð að vera á undan mér að klára meðhöndlunina!!! Og við vorum ekki einu sinni í tímaþröng.

Og eitt að lokum: Við Jóna erum búnar að vera í skólanum í 6 mánuði. Kennararnir þekkja ekki ennþá nöfnin okkar og rugla okkur ennþá saman (þær eru tvær sem kenna okkur). Gestakennarar og skólastjórinn þekkja okkur í sundur og muna hvað við heitum þó það líði margar vikur á milli þar til við hittumst. Og við erum örugglega búnar að læra 20 ný nöfn síðan við byrjuðum í skólanum og við getum þekkt fólk í sundur . Ég verð bara að segja að ég er farin að verða hálf móðguð yfir þessu. Mér finnst þetta vanvirðing. Arrggg og garg...

Jæja nú er ég búin að pústa aðeins .

Já best að fara að hætta þessu bulli. Ég er fríi í skólanum í dag. Fer til læknis á eftir, alla leið til Aabenraa í forskoðun v/gallsteinaaðgerðar, en ég verð síðan að bíða í 2 mánuði eftir að komast í sjálfa aðgerðina.
Síðan er körfuboltaæfing í kvöld, ó my god... harðsperrur í vændum!!!

Bless í bili...